| 1 |
א
|
לְדָוִ֡ד אֵ֘לֶ֤יךָ יְהוָ֨ה אֶקְרָ֗א צוּרִי֮ אַֽל-תֶּחֱרַ֪שׁ מִ֫מֶּ֥נִּי פֶּן-תֶּֽחֱשֶׁ֥ה מִמֶּ֑נִּי וְ֝נִמְשַׁ֗לְתִּי עִם-יֹ֥ורְדֵי בֹֽור
|
| 2 |
ב
|
שְׁמַ֤ע קֹ֣ול תַּ֭חֲנוּנַי בְּשַׁוְּעִ֣י אֵלֶ֑יךָ בְּנָשְׂאִ֥י יָ֝דַ֗י אֶל-דְּבִ֥יר קָדְשֶֽׁךָ
|
| 3 |
ג
|
אַל-תִּמְשְׁכֵ֣נִי עִם-רְשָׁעִים֮ וְעִם-פֹּ֪עֲלֵ֫י אָ֥וֶן דֹּבְרֵ֣י שָׁ֭לוֹם עִם-רֵֽעֵיהֶ֑ם וְ֝רָעָ֗ה בִּלְבָבָֽם
|
| 4 |
ד
|
תֶּן-לָהֶ֣ם כְּפָעֳלָם֮ וּכְרֹ֪עַ מַֽעַלְלֵ֫יהֶ֥ם כְּמַעֲשֵׂ֣ה יְ֭דֵיהֶם תֵּ֣ן לָהֶ֑ם הָשֵׁ֖ב גְּמוּלָ֣ם לָהֶֽם
|
| 5 |
ה
|
כִּ֤י לֹ֤א יָבִ֡ינוּ אֶל-פְּעֻלֹּ֣ת יְ֭הוָה וְאֶל-מַעֲשֵׂ֣ה יָדָ֑יו יֶ֝הֶרְסֵ֗ם וְלֹ֣א יִבְנֵֽם
|
| 6 |
ו
|
בָּר֥וּךְ יְהוָ֑ה כִּי-שָׁ֝מַע קֹ֣ול תַּחֲנוּנָֽי
|
| 7 |
ז
|
יְהוָ֤ה עֻזִּ֥י וּמָגִנִּי֮ בֹּ֤ו בָטַ֥ח לִבִּ֗י וְֽנֶ֫עֱזָ֥רְתִּי וַיַּעֲלֹ֥ז לִבִּ֑י וּֽמִשִּׁירִ֥י אֲהֹודֶֽנּוּ
|
| 8 |
ח
|
יְהוָ֥ה עֹֽז-לָ֑מֹו וּמָ֘עֹ֤וז יְשׁוּעֹ֖ות מְשִׁיחֹ֣ו הֽוּא
|
| 9 |
ט
|
הֹושִׁ֤יעָה אֶת-עַמֶּ֗ךָ וּבָרֵ֥ךְ אֶת-נַחֲלָתֶ֑ךָ וּֽרְעֵ֥ם וְ֝נַשְּׂאֵ֗ם עַד-הָעֹולָֽם
|